AMANZHOLOV UNIVERSITY-ДЕ «АРУ-АНА» РЕСПУБЛИКАЛЫҚ БАЙҚАУЫНЫҢ ЛАУРЕАТЫ АЛИЯ АХМЕДЖАНОВАМЕН КЕЗДЕСУ ӨТТІ

Бүгін Сәрсен Аманжолов атындағы Шығыс Қазақстан университетінде «Ару-Ана» республикалық байқауының «Азаматтық өзіндік сананы дамыту саласындағы үздік жоба» номинациясы бойынша лауреаты Алия Ахмеджановамен студенттердің кездесуі өтті. Әлеуметтік маңызы зор жобаны табысты жүзеге асырғаны үшін ол Қазақстан Республикасының Президенті тарапынан марапатталған.

Кездесу барысында Алия Ахмеджанова студенттерге «Students on ice» жобасын таныстырып, жастардың әлеуметтік бастамаларға қатысуының маңыздылығына тоқталды. Оның айтуынша, мұндай жобалар студенттердің әлеуетін ашуға, тәжірибелік білім мен дағдыларды меңгеруге мүмкіндік береді, ал бұл қабілеттерді оқу үдерісі аясында алу әрдайым мүмкін бола бермейді.

«Students on ice» жобасының негізгі мақсаты – студенттерді нөлдік деңгейден бастап кәсіби мәнерлеп сырғанауға үйрету. Жобаға спорт шеберлігіне үміткерлер тартылып, бағдарлама алты айға есептелген. Нәтижесінде қатысушылар жарыстарға қатысып, өз өнерлері арқылы әлеуметтік маңызы бар тақырыптарды шығармашылық әрі көркемдік тұрғыда көтеретін болады. Жоба демеушілердің қолдауымен жүзеге асырылып, мемлекеттік қаржы қаражаты тартылмайды.

– Жоба аясында жастар еңбек нарығында сұранысқа ие болуы мүмкін дағдылар мен құзыреттерді меңгереді. Тұрақты жаттығулар салауатты өмір салтын қалыптастыруға ықпал етеді, ал жобаның өзі спортты насихаттап, қоғамға нақты пайда әкеледі. Сонымен қатар, ол жастарды әлеуметтік оқшаулану мен кедейлік сияқты қауіптердің алдын алуға көмектеседі, – деп атап өтті Алия Ахмеджанова.

Кездесу ашық диалог форматында өтті. Студенттер жобаның мазмұнына қызығушылық танытып, қатысу мүмкіндіктері туралы сұрақтар қойып, өз ой-пікірлерімен бөлісті. Іс-шара жастардың әлеуметтік бастамалардағы рөлі мен азаматтық сананы қалыптастыру мәселелерін талқылауға арналған пайдалы алаңға айналды.

Сәрсен Аманжолов атындағы Шығыс Қазақстан университеті студенттердің әлеуметтік белсенділігін, көшбасшылық қасиеттерін және практикалық дағдыларын дамытуға бағытталған бастамаларды жүйелі түрде қолдап, олардың жан-жақты тұлғалық әрі кәсіби қалыптасуына қолайлы жағдай жасап келеді.