АМАНЖОЛОВ УНИВЕРСИТЕТІНДЕ «ТАБИҒАТТЫҢ ТІРІ МОЗАИКАСЫ: ЛАНДШАФТТЫҢ ҚҰРЫЛЫМЫ МЕН ФУНКЦИЯЛАРЫ» ТАҚЫРЫБЫНДА ҚОНАҚ ДӘРІСІ ӨТТІ

Сәрсен Аманжолов атындағы Шығыс Қазақстан университеті Экология және география кафедрасында «Табиғаттың тірі мозаикасы: ландшафттың құрылымы мен функциялары» тақырыбында қонақ дәрісі ұйымдастырылды. Іс-шара университеттің 8-оқу ғимаратының конференц-залында өтіп, «Экология» білім беру бағдарламасының 2-курс студенттерін қамтыды.

Қонақ дәрісті Қ.И. Сәтбаев атындағы Қазақ ұлттық зерттеу техникалық университеті «Биоэкологиялық инженерия» білім беру бағдарламасының докторанты, С. Аманжолов атындағы ШҚУ Ұлттық ғылыми ұжымдық пайдаланым зертханасының Өсімдіктер биологиясы және биотехнологиясы зертханасының қызметкері Ксения Богданова, сондай-ақ Экология және география кафедрасының оқытушысы Жазнаева Ж.К. жүргізді.

Дәріс барысында ландшафтты барлық құрамдас бөліктері өзара тығыз байланысқан және белгілі бір функцияларды атқаратын тұтас жүйе ретінде қарастыратын заманауи ғылыми тәсілдер талқыланды. Әсіресе қалалық және саябақ ландшафттарын экологиялық, инженерлік-жоспарлау және әлеуметтік аспектілерді біріктіретін динамикалық құрылым ретінде зерделеуге мүмкіндік беретін «табиғаттың тірі мозаикасы» тұжырымдамасына ерекше назар аударылды.

Студенттерге тұрақты ландшафттық шешімдерді қалыптастырудың негізгі қағидаттары ұсынылды. Атап айтқанда, аумақты функционалдық аймақтарға бөлу, қозғалыс сценарийлерін жоспарлау, композициялық қаңқа құру, отырғызулардың ярустық құрылымы, сондай-ақ стресс факторларын және күтім жасау мүмкіндіктерін ескере отырып, қалалық орта мен саябақтарға өсімдіктерді іріктеу критерийлері жан-жақты түсіндірілді.

Кездесу барысында тәжірибе алмасу жүзеге асып, білім алушылар ландшафттық жобалаудың практикалық мысалдарын талқылап, экологиялық тәжірибеде жүйелік тәсілді қолдануға қатысты сұрақтар қойды.

Өткізілген қонақ дәрісі студенттердің экологиялық және кеңістіктік ойлау қабілеттерін дамытуға, сондай-ақ жайлы әрі тұрақты қалалық ортаны қалыптастырудағы ландшафт дизайнының маңызын терең түсінуге ықпал етті.