АМАНЖОЛОВ УНИВЕРСИТЕТІ ӨКІЛДЕРІ ӨСКЕМЕН ЖОҒАРЫ МЕДИЦИНАЛЫҚ КОЛЛЕДЖІ ТҮЛЕКТЕРІНЕ АРНАЛҒАН КӘСІПТІК БАҒДАР БЕРУ ІС-ШАРАСЫНА ҚАТЫСТЫ

Сәрсен Аманжолов атындағы Шығыс Қазақстан университеті Психология және түзету педагогикасы кафедрасының өкілдері Өскемен жоғары медициналық колледжі түлектеріне арналған кәсіптік бағдар беру іс-шарасына қатысты.

Кездесу барысында кафедра оқытушылары Кукина Ю.Е. және Байтемирова К.Б. университеттің білім беру бағдарламаларын таныстырып, психология және түзету педагогикасы бағыттары бойынша оқуын жалғастыру мүмкіндіктері туралы жан-жақты ақпарат берді. Сонымен қатар, оқуға түсу талаптары, академиялық ұтқырлық бағдарламалары және кәсіби өсу перспективалары кеңінен түсіндірілді.

Әсіресе психология мен медицинаның пәнаралық ықпалдастығы, денсаулық сақтау жүйесіндегі психологтің рөлі, сондай-ақ медициналық мамандық түлектерінің психологиялық көмек көрсету саласында кәсіби өзін-өзі жүзеге асыру мүмкіндіктері мәселелеріне ерекше назар аударылды.

Іс-шара ашық диалог форматында өтті. Колледж түлектері білімін жалғастыруға қызығушылық танытып, оқу траекториялары мен болашақ жұмысқа орналасу мүмкіндіктері жөнінде бірқатар сұрақтар қойды.

Мұндай кәсіптік бағдар беру жұмыстары өңірдегі білім беру ұйымдары арасындағы әріптестік байланысты нығайтып, жастардың академиялық және кәсіби дамуына кең мүмкіндік береді.