ҚАРТЫ БАР ҮЙДІҢ ҚАЗЫНАСЫ БАР

С.Аманжолов атындағы ШҚУ-дың белсенді студенттері 1 қазан Халықаралық қарттар күніне орай ШҚО жұмыспен қамту және әлеуметтік бағдарламаларды үйлестіру басқармасының “Өскемен арнайы әлеуметтік қызмет көрсету орталығы” коммуналдық мемлекеттік мекемесіне барып қазыналы қарттармен кездесті.

ШҚУ тәрбие жұмысы және әлеуметтік мәселелер бөлімінің ұйымдастыруымен өткен шараның мақсаты қарттардың қоғам алдындағы еңбегін құрметтеу, олардың мәселелері мен қажеттіліктерін білу. Көңіл күйлерін көтеру әрі қамқорлық таныту.

Жастармен көңілді ән салған қарттар үйінің қызмет алушысы Серік Есетов өз өмірінен сыр шертіп, жастарға ақ батасын берді.

— Бізге көтеріңкі көңіл күй сыйлап келген студенттерге алғысым шексіз. Өнерлі жастардың арқасында қуанып отырмыз. Әрқашан жолдарың ашық болсын. Алған білімдеріңмен елдің дамып, көркейуіне үлес қоса беріңдер, — деді ақсақал.

Қазір бұл орталықта 100-ден аса қарт бар. Олар әсем әннің ырғағымен билеп, ән айтып, жастармен тілдесіп әсерлерімен бөлісті.

— Біз бүгін егде жастағы адамдарға құрметімізді, сыйластығымызды білдіру мақсатында келдік. Ата, апалардың жүзіндегі қуанышты көру біз үшін бақыт. Қарттарымыз аман болсын. Қоғам үшін сіңірген еңбектерін ұмытпаймыз, — деді ШҚУ студенті.