АМАНЖОЛОВ УНИВЕРСИТЕТІНДЕ ЦИФРЛЫҚ ҚАУІПСІЗДІК ТУРАЛЫ ДӘРІС ӨТТІ

Бүгін Аманжолов университетінде студенттерге арналған цифрлық қауіпсіздік және интернет-алаяқтықтан қорғау мәселелеріне бағытталған танымдық әрі өзекті дәріс өтті. Іс-шараның спикері – Шығыс Қазақстан облысы бойынша Экономикалық тергеп-тексеру департаментінің Ұйымдастыру-бақылау басқармасының аса маңызды істер жөніндегі тергеушісі Жандос Мұзтауов, ол өзінің кәсіби тәжірибесімен және нақты тергеу материалдарымен бөлісті.

Дәріс барысында студенттер интернет-алаяқтықтың кең таралған схемалары, жәбірленушілерге қолданылатын психологиялық ықпал ету әдістері және заманауи киберқауіптер туралы тың ақпарат алды. Жандос Мұзтауов қаскөйлердің жеке деректерге қалай қол жеткізетінін, қолданушылар жиі жіберетін қателіктерді және цифрлық қылмыстардың құрбанына айналмас үшін қандай шаралар жасау қажеттігін жан-жақты түсіндірді.

Қатысушылардың ерекше қызығушылығын тудырғаны – практикалық мысалдар, бейнематериалдар және мұндай қылмыстардың тергелу барысына қатысты спикердің түсіндірмелері болды. Студенттер күмәнді сілтемелер мен хабарламаларды қалай ажырату, аккаунттарды қорғау және цифрлық гигиенаны сақтаудың маңыздылығы жөнінде құнды кеңестер алды.

Іс-шара өте белсенді өтті: студенттер сұрақтар қойып, кең таралған жағдайларды талқылап, өздерінің цифрлық қауіптерге қатысты тәжірибелерімен бөлісті.

Осындай кездесулер жастардың онлайн кеңістікте саналы және қауіпсіз мінез-құлық қалыптастыруына ықпал етеді. Университет цифрлық сауаттылықты арттыру және студенттерді заманауи қауіптерден қорғау бағытындағы білім беру іс-шараларын жалғастырады.