AMANZHOLOV UNIVERSITY-ДІҢ СТУДЕНТ-ЭКОЛОГТАРЫ «КӨРІКТІ ӘРІ СҮЙІКТІ ҚАЛА» ЭКОАКЦИЯСЫНА ҮЛЕС ҚОСТЫ

2026 жылғы 25–27 қыркүйек аралығында Сәрсен Аманжолов атындағы Шығыс Қазақстан университеті Экология және география кафедрасының орыс тілінде білім алатын «Экология» білім беру бағдарламасының 2-курс студенттері «Таза Қазақстан» ұлттық бағдарламасы аясында ұйымдастырылған «Көрікті әрі сүйікті қала» экоакциясына қатысты.

Іс-шара топ кураторы, сениор-лектор Серік Асқарұлы Бакиннің жетекшілігімен өтті. Экоакция қоршаған ортаға жауапкершілікпен қарауды қалыптастыруға, экологиялық мәдениетті дамытуға және жастардың туған қаланың тазалығы мен абаттандырылуына деген қызығушылығын арттыруға бағытталды.

Үш күн бойы болашақ экологтар Өскемен қаласының түрлі аумақтарын аралап, оның жасыл аймақтарын, көшелерін, саябандары мен скверлерін және басқа да абаттандырылған орындарын суретке түсірді. Студенттер фотосуреттер арқылы қаланы күнделікті қандай күйде көргісі келетінін — таза, жасыл, көрікті әрі тұрғындарға қолайлы мекен ретінде көрсетуге атсалысты.

Экоакцияның практикалық бағытына да ерекше көңіл бөлінді. Қатысушылар өздері таңдаған аумақтарды ретке келтіріп, қоқыс жинап, қоғамдық орындардың тазалығын сақтауға атсалысты. Осылайша студенттер табиғатқа ұқыпты қараудың маңыздылығын айтып қана қоймай, экологиялық жауапкершілікті нақты істерімен көрсетті.

Акция барысында түсірілген фотосуреттер Өскемен қаласының көркін және оны сақтауға бағытталған нақты әрекеттерді қамтыған үш күннің өзіндік шежіресіне айналды. Әрбір сурет қалалық ортаның тазалығы мен жайлылығы тұрғындардың күнделікті әрекеті мен жауапкершілігіне тікелей байланысты екенін көрсетті.

«Экология» білім беру бағдарламасы студенттері үшін мұндай бастамаларға қатысудың маңызы зор. Болашақ мамандардың кәсіби даярлығы экологиялық мәселелер мен қоршаған ортаны қорғау әдістерін зерделеумен ғана шектелмей, табиғат пен қалалық ортаның жағдайына деген жеке жауапкершілікті қалыптастыруды да қамтиды.

«Көрікті әрі сүйікті қала» экоакциясы экологиялық ағартушылықтың нақты істермен ұштасатынын көрсетті. Өйткені қалаға деген қамқорлық әр адамның күнделікті әрекетінен басталады: қоқыс қалдырмау, жасыл желектерді қорғау, тазалықты сақтау және өз ісімен айналасындағыларға табиғатқа жауапкершілікпен қараудың үлгісін көрсету.