АКАДЕМИЯЛЫҚ ҰТҚЫРЛЫҚ – ЖАҢА МҮМКІНДІКТЕРГЕ БАСТАР ЖОЛ

Академиялық ұтқырлық бағдарламасы студенттерге халықаралық білім беру тәжірибесін жинақтауға, басқа елдердің мәдениетімен танысуға және кәсіби әлеуетін дамытуға кең мүмкіндіктер ашады. Сәрсен Аманжолов атындағы Шығыс Қазақстан университетінің студенті Айым Медетқызы Құмарғазы да білімін тереңдетіп, шетелде оқу тәжірибесін жинақтау мақсатында осы мүмкіндікті пайдаланды.

Қазіргі уақытта Айым Түркия Республикасындағы Бурса Ұлудаг университетінде білім алуда. Академиялық ұтқырлықтың маңызды артықшылықтарының бірі — әлемнің түрлі елдерінен келген студенттермен танысып, олардың мәдениеті мен ұлттық дәстүрлері туралы көбірек білу мүмкіндігі. Халықаралық ортадағы қарым-қатынас, университеттік іс-шараларға қатысу және жаңа таныстықтар студенттің дүниетанымын кеңейтіп, коммуникативтік дағдыларын дамытуға және жаңа ортаға бейімделуіне ықпал етеді.

Шетелде білім алу Айымның түрік және ағылшын тілдерін меңгеру дағдыларын жетілдіруге де мүмкіндік береді. Күнделікті қарым-қатынас пен оқу сабақтары ауызекі сөйлеу қабілетін дамытуға, сөздік қорын байытуға және шет тілдерін қолданудағы сенімділігін арттыруға көмектеседі. Сонымен қатар студент өз бетінше шешім қабылдау, уақытты тиімді жоспарлау және әртүрлі мәдениет өкілдерімен қарым-қатынас жасау дағдыларын дамытып келеді.

«Академиялық ұтқырлық бағдарламасы маған халықаралық тәжірибе жинақтауға, білімімді тереңдетуге және болашақ мамандығыма жаңаша көзқараспен қарауға мүмкіндік берді. Басқа елдің білім беру жүйесімен және оқытудың жаңа әдістерімен танысу менің тұлғалық және кәсіби дамуыма оң әсер етуде. Бұл тәжірибе өзіме деген сенімділігімді арттырып, дүниетанымымды кеңейтуге және алдағы мақсаттарымды айқындауға көмектеседі», — дейді Айым Медетқызы Құмарғазы.

Студенттердің академиялық ұтқырлық бағдарламаларына қатысуы Сәрсен Аманжолов атындағы Шығыс Қазақстан университеті үшін де маңызды. Мұндай бастамалар халықаралық академиялық байланыстарды нығайтуға, білім беру тәжірибесімен алмасуға және жоғары оқу орындары арасындағы ынтымақтастық мүмкіндіктерін кеңейтуге ықпал етеді.