AMANZHOLOV UNIVERSITY “БАЖОВ КИНОМАРАФОНЫНЫҢ” ОРТАЛЫҒЫНДА

Пушкин атындағы кітапханада «Бажов киномарафоны» өтті. Іс-шараны «БАЖОВ» қайырымдылық қоры Ресейдегі (Екатеринбург) Президенттік мәдени бастамалар қорының қолдауымен ұйымдастырды. Бұл оқиға халықаралық мәдени байланыстардың, әсіресе Қазақстан мен Ресей арасындағы ынтымақтастықтың қаншалықты маңызды әрі мазмұнды екенін көрсетті.

Бұл мәдени диалогта Сәрсен Аманжолов атындағы Шығыс Қазақстан университетінің қазақ, орыс филологиясы және журналистика кафедрасы ерекше рөл атқарады. Кафедра соңғы бес жыл бойы «Бажов» халықаралық қорымен белсенді ынтымақтастық орнатып келеді. Бұл серіктестік 2021 жылы басталды. Сол кезде Аманжолов университетінің студенттері халықаралық дөңгелек үстелге қатысып, П.П. Бажов шығармашылығына арналған алты жобасын ұсынған болатын. Бұл сәт жаңа мүмкіндіктерге жол ашты.

2022 жылы студенттер Екатеринбург қаласында өткен халықаралық ғылыми конференцияға қатысып, Бажов шығармашылығы туралы баяндамаларын пленарлық отырыста қорғады. Ал «Бажов киномарафоны» осы жемісті серіктестіктің жаңа кезеңіне айналды.

Іс-шараның ашылуында «Орыс тілі мен әдебиеті» мамандығы студенттері «Бажов Алтайда: өлең түріндегі аңыз» атты бейнежобасын ұсынды. Сонымен қатар «Қазақ тілі мен әдебиеті» мамандығы студенттері «Күміс тұяқ» («Серебряное копытце») шығармасының экранизациясынан үзінді көрсетті.

Айта кету керек, бұл шығарманың қазақ тіліне аударылуы «Бажов» қайырымдылық қорының бастамасымен жүзеге асқан.

Киномарафонның ең маңызды сәттерінің бірі – «Кейінге қалдырылған уақыт» («Отложенное время») фильмінің режиссері А. Киммен өткен шығармашылық кездесу болды. Студенттер режиссермен тікелей сұхбаттасып, киноөнер мен шығармашылық үдеріс туралы маңызды сұрақтарға жауап алды.

«Бажов киномарафоны» – бұл жай ғана фильм көру емес, халықаралық мәдени байланыстың жарқын көрінісі. Өнер халықтарды біріктіретін ортақ тілге айналып, бірлескен жобалар мәдениеттер мен ұрпақтарды жалғайтын берік көпір болып отыр.