AMANZHOLOV UNIVERSITY-ДЕ РЕКТОРДЫҢ СТУДЕНТТЕРМЕН АШЫҚ ФОРМАТТАҒЫ КЕЗДЕСУІ ӨТТІ

Сәрсен Аманжолов атындағы Шығыс Қазақстан университетінде Басқарма төрағасы – ректор Гүлжан Жарасованың университеттің белсенді студенттерімен кездесуі өтті.

Кездесуде жастардың бастамалары, студенттік бірлестіктерді дамыту, өзін-өзі жүзеге асырудың жаңа мүмкіндіктері және университет басшылығы мен студенттер арасындағы ашық байланыс мәселелері талқыланды.

Кездесу басталар алдында университеттің холында студенттік бірлестіктердің белсенді қызметін таныстыратын көрме ұйымдастырылды. Көрмеде студенттердің жетістіктері үшін алған Құрмет грамоталары, кубоктар және басқа да марапаттары қойылды. Шараға студенттердің өздері дайындаған тақырыптық ойындар, зияткерлік викториналар мен логикалық тапсырмалар ерекше мазмұн берді. Әр тапсырма ұсынылған бірлестіктердің қызмет бағыты мен ерекшелігін көрсетті. Бұл қатысушыларға студенттік бастамалар туралы көбірек білуге ғана емес, олардың жұмысына тікелей араласуға да мүмкіндік берді.

Бүгінде университетте әрқайсысы шығармашылық, қарым-қатынас, даму және идеяларды жүзеге асыру үшін өзіндік орта қалыптастыратын көптеген студенттік бірлестік жұмыс істейді. Кездесуге волонтерлік, зияткерлік, шығармашылық, спорттық және қоғамдық бағыттарды қамтитын 22 студенттік ұйым мен клуб қатысты. Шараға университеттің жоғары мектептерінің белсенділері де қосылды. Олардың қатарында «Econom Pride», «Dragon Kingdom», «Warriors Clan», «Phoenix Team» және «Empire Eagles» командалары бар.

Студенттік ұйымдар – жай ғана қызығушылықтары ортақ жастардың бірлестігі емес. Бұл – бастамалар дүниеге келетін, көшбасшылық қасиеттер қалыптасатын, таланттар ашылып, құнды практикалық тәжірибе жинақталатын орта. Олардың қызметіне қатысу студенттерге пікірлес адамдарды табуға, өз жобаларын жүзеге асыруға, коммуникациялық дағдыларын дамытуға және университет өміріне белсенді араласуға мүмкіндік береді.

Әрбір бірлестік мазмұнды әрі заманауи студенттік ортаны қалыптастыруға өзіндік үлесін қосады. Мұнда идеяларға қолдау көрсетіліп, бастамалар нақты жобаларға айналады, ал студенттердің дамуға деген ұмтылысы университет өмірінің маңызды бөлігіне айналады.

Кездесуде Гүлжан Жарасова студенттерге өзі туралы айтып, жеке тәжірибесімен және университетті одан әрі дамыту жөніндегі өз көзқарасымен бөлісті. Ашық әңгіме студенттерге ректормен бейресми әрі сенімді ортада жақынырақ танысуға, сондай-ақ оның қызметінде басшылыққа алатын қағидаттары мен басымдықтарын білуге мүмкіндік берді.

Кездесудің маңызды бөлігі студенттермен тікелей байланысқа арналды. QR-код арқылы қатысушылар арнайы платформаға өтіп, өздерін қызықтырған сұрақтарын анонимді түрде жолдай алды. Мұндай формат әңгімені барынша ашық әрі мазмұнды өткізуге мүмкіндік берді. Студенттер бүгінгі таңда өздерін толғандыратын мәселелерді еркін жеткізе алды.

Өз сөзінде ректор жастардың университетті дамытудағы ерекше рөлін атап өтіп, бастамашылдықтың, жауапкершіліктің, жаңа білімге ұмтылыстың және университет өміріне белсенді қатысуға дайын болудың маңыздылығына тоқталды.

Кездесу Сәрсен Аманжолов атындағы Шығыс Қазақстан университетінің белсенді студенттері – дамуға, жаңалық жасауға және өз университетінің болашағын қалыптастыруға белсенді атсалысуға дайын, жігерлі әрі бастамашыл жастар қауымы екенін көрсетті.

Дәл осындай ашық байланыс, бастамаларға қолдау көрсету және бірлескен жұмыс арқылы студенттердің идеялары ескерілетін, мүмкіндіктер кеңейетін, ал жастардың әлеуеті университет дамуының маңызды ресурстарының біріне айналатын орта қалыптасады.