АМАНЖОЛОВ УНИВЕРСИТЕТІНДЕ ФИЛОЛОГИЯ ЖӘНЕ ЖУРНАЛИСТИКАНЫҢ ӨЗЕКТІ МӘСЕЛЕЛЕРІ ТАЛҚЫЛАНДЫ

21 мамырда Сәрсен Аманжолов атындағы Шығыс Қазақстан университетінде профессор Люция Ильдарқызы Абдуллинаның рухына арналған «Филология және журналистиканың өзекті мәселелері» атты V Халықаралық ғылыми-практикалық конференция өтті.

Ауқымды ғылыми жиын Қазақстан, Ресей, Өзбекстан және Тәжікстан елдерінің зерттеушілерін, оқытушыларын, жас ғалымдарын, магистранттары мен студенттерін біріктірді. Конференция аралас форматта ұйымдастырылып, қазіргі филология, әдебиеттану, журналистика және медиакоммуникация салаларындағы өзекті мәселелерді талқылауға арналған маңызды ғылыми алаңға айналды.

Конференция жұмысының басты назарында гуманитарлық білімнің жасанды интеллект технологияларының даму жағдайындағы трансформациясы, медиакеңістіктің өзгеруі және филологиялық білім берудің жаңа бағыттары болды.

Қатысушыларға құттықтау сөз сөйлеген Сәрсен Аманжолов атындағы ШҚУ Басқарма төрағасы – ректор Мұхтар Әділбекұлы Төлеген конференцияның ғылыми қауымдастық үшін маңыздылығын атап өтті. Оның айтуынша, мұндай халықаралық алаңдар гуманитарлық ғылымдардың дамуына, тәжірибе алмасуға және жаңа зерттеу бағыттарын қалыптастыруға мүмкіндік береді.

Пленарлық отырыста Люция Ильдарқызы Абдуллинаның ғылыми және педагогикалық мұрасы, заманауи риторика, журналистика, медиамәтін, көркем шығарманың кеңістігі және филологиялық білім беруде жасанды интеллект технологияларын қолдану мәселелері бойынша баяндамалар ұсынылды.

Конференция қатысушылары Люция Ильдарқызы Абдуллинаның тұлғасына ерекше тоқталып, оның университетте 38 жылдық кәсіби қызмет атқарғанын атап өтті. Ғалымның Шығыс Қазақстандағы филологиялық және журналистік білім беруді дамытуға, ғылыми-ағартушылық жобаларды ұйымдастыруға, жас мамандар даярлауға және өңірдің гуманитарлық кеңістігін қалыптастыруға қосқан үлесі жоғары бағаланды.

Пленарлық мәжілісте Сәрсен Аманжолов атындағы ШҚУ, Л.Н. Гумилев атындағы Еуразия ұлттық университеті, А.С. Грибоедов атындағы Мәскеу университеті, Санкт-Петербург мемлекеттік өнеркәсіптік технологиялар және дизайн университеті, Ташкенттегі Әлем тілдері мемлекеттік университеті және басқа да жоғары оқу орындарының ғалымдары баяндама жасады.

Баяндамалар қазіргі әдебиеттану зерттеулерін, медиадискурс мәселелерін, заманауи медиамәтіннің когнитивтік тетіктерін, сондай-ақ генеративті жасанды интеллект технологияларының филологиялық білім мен журналистика тәжірибесіне ықпалын қамтыды.

Конференция жұмысы төрт секция бойынша жалғасты:
– «Лингвистика мен әдебиеттанудың өзекті мәселелері»;
– «Филологияны оқытудың инновациялық технологиялары»;
– «Жасанды интеллект технологияларының дамуы жағдайындағы филологиялық білімнің трансформациясы»;
– «Журналистиканың тарихы, теориясы және практикасы».

Секция отырыстарында қатысушылар Қазақстанның қазіргі әдебиеті, мәдениетаралық коммуникация, интернет-коммуникация, инклюзивті білім беру, медиасауаттылық, гуманитарлық білімнің цифрлық трансформациясы және орыс тілі мен әдебиетін оқытуда жасанды интеллект құралдарын пайдалану мәселелерін талқылады.

Халықаралық конференция кәсіби диалог, ғылыми тәжірибе алмасу және қазіргі филология мен журналистиканың даму бағыттарын талқылауға арналған маңызды алаңға айналды. Ғылыми форум Люция Ильдарқызы Абдуллинаның ғылыми-әдістемелік мұрасының бүгінгі гуманитарлық және білім беру үдерістерімен сабақтастығын тағы бір мәрте айқындады.