ҚЫРҒЫЗСТАН СТУДЕНТТЕРІ AMANZHOLOV UNIVERSITY-ДЕ ORHUN БАҒДАРЛАМАСЫ БОЙЫНША БІЛІМ АЛУДА

Сәрсен Аманжолов атындағы Шығыс Қазақстан университетінде академиялық ұтқырлықтың Orhun бағдарламасы аясында Қазақстанға келген Қырғыз Республикасының Халықаралық университеті студенттерінің білім алуы жалғасуда.

Ергешова Айпери, Казанцева Анна Сергеевна және Айжигитова Амина Нурсултановна бір ай бойы 6B01707 «Шетел тілдері (IP)» білім беру бағдарламасы бойынша білім алуда.

Университеттегі алғашқы апталар студенттер үшін жаңа академиялық ортамен танысу кезеңі болды. Олар оқу сабақтарына қатысып, оқытушылармен және студенттермен қарым-қатынас орнатып, университет өміріне белсенді араласып, білім алудың жаңа жағдайларына біртіндеп бейімделуде.

Басқа жоғары оқу орнында білім алу студенттерге кәсіби пәндерді меңгеруді жалғастырып қана қоймай, білім беру үдерісін ұйымдастырудың түрлі тәсілдерімен танысуға мүмкіндік береді. Халықаралық академиялық ұтқырлық сонымен қатар студенттердің дербестігін арттыруға, дүниетанымын кеңейтуге және мәдениетаралық құзыреттерін қалыптастыруға ықпал етеді.

Өскеменде болған уақыт ішінде студенттер Шығыс Қазақстанның қаласымен, мәдениетімен және дәстүрлерімен танысып үлгерді. Жаңа таныстықтар мен қатарластарының ортасындағы қарым-қатынас олардың Қазақстандағы сапарының маңызды бөлігіне айналды.

Сәрсен Аманжолов атындағы Шығыс Қазақстан университеті студенттерге оқу, тұру және жаңа ортаға бейімделу мәселелері бойынша қажетті ұйымдастырушылық және консультациялық қолдау көрсетуде.

Orhun бағдарламасы Орталық Азия елдерінің жоғары оқу орындары арасындағы академиялық байланыстарды дамытуға ықпал етіп, білім, білім беру тәжірибесі мен мәдени құндылықтар алмасуына мүмкіндік береді.

Сәрсен Аманжолов атындағы Шығыс Қазақстан университеті үшін мұндай бастамаларға қатысу — халықаралық ынтымақтастықты кеңейтіп, студенттерге жаңа академиялық әрі өмірлік тәжірибе жинақтауға мүмкіндік беретін орта қалыптастырудың маңызды бағыты.

Айпери, Анна және Аминаға оқуда табыс, жаңа таныстықтар, қызықты жаңалықтар мен Қазақстанда өткізетін уақыттарынан жарқын әсер тілейміз!