AMANZHOLOV UNIVERSITY-ДЕ ДЦП ЖӘНЕ МҮГЕДЕКТІГІ БАР АДАМДАР КҮНІНЕ ОРАЙ КЕЙС-СЕССИЯ ӨТТІ

Сәрсен Аманжолов атындағы Шығыс Қазақстан университетінде Дүниежүзілік балалардың церебралды сал ауруы күніне және Қазақстан Республикасындағы Мүгедектігі бар адамдар күніне орай сараптамалық кейс-сессия және практикалық интенсив өтті.

Іс-шара Шығыс Қазақстан облысы білім басқармасының Облыстық психологиялық-медициналық-педагогикалық консультациясының және Өскемен қаласы бойынша білім бөлімінің қолдауымен ұйымдастырылды. Кездесуге дәрігерлер, педагогтер, арнайы педагогтер, логопедтер, психологтер, емдік дене шынықтыру және бейімделген дене шынықтыру мамандары, студенттер мен білім беру жүйесінің өкілдері қатысты.

Кездесудің негізгі өзегіне медициналық диагноздан баланың мүмкіндіктерін ашуға және оны білім беру процесінің толыққанды қатысушысы етуге бағытталған нақты психологиялық-педагогикалық шешімдерге көшу жолдары арқау болды.

Кездесу жас қатысушылардың өнер көрсетуімен басталды. №50 жалпы білім беретін мектептің 10 «Б» сынып оқушысы Айзар Ғалымов «Бақ» әнін орындаса, №10 мектеп-гимназияның 4 «Г» сынып оқушысы Есения Канталинская «Моя Десяточка» атты авторлық өлеңін оқыды. Оқушылардың шығармашылық қойылымдары кездесуге ерекше көңіл күй сыйлап, әр баланың өз қабілетін танытуға, өз ойын жеткізуге және ортақ ортаның бір бөлігі екенін сезінуге мүмкіндік берілуі қажеттігін көрсетті.

Сараптамалық бөлімде түрлі бағыттағы мамандар бас қосты. Олардың қатарында дәрігер-невролог Алтын Чинабаева, ОПМПК басшысы Рауан Байчинов, «Страна чудес» арнайы мектеп-балабақшасының педагог-логопеді Юлия Шаршова, «Ақ ниет» мектеп-интернатының бейімделген және емдік дене шынықтыру нұсқаушысы Ақжол Мамырбеков, №10 мектеп-гимназиясының педагогі Вера Молявко, №12 мектеп-гимназиясының педагогі Юлия Зубарева және Сәрсен Аманжолов атындағы Шығыс Қазақстан университетінің лекторы Яна Тхоржевская болды.

Қатысушылар ДЦП-сы бар балаларды сүйемелдеудің ерекшеліктерін медицина, педагогика, арнайы педагогика, логопедия, психология және дене шынықтыру арқылы оңалту бағыттары тұрғысынан талқылады. Әсіресе пәнаралық өзара іс-қимылға және кәсіби білімді баланың жеке қажеттіліктері төңірегінде біріктіру қажеттілігіне ерекше назар аударылды.

Қатысушылардың қызығушылығын Алима Алтипова мен Гаухар Шаяхметова өткізген кейс-зертхана да тудырды. Онда қатысушылар «Ол бәрін түсінеді, бірақ үлгермейді», «Оны жалпы сыныпта оқытуға бола ма?», «Ол жауабын біледі, бірақ жазып үлгермейді», «Қиындықтан әрекетке», «Бір бала – мамандар командасы» атты нақты педагогикалық жағдаяттармен жұмыс істеді.

Жұмыс топтарда жүргізілді. Қатысушылар жағдаяттарды талдап, шешу жолдарын ұсынды, сарапшылардың кері байланысын алып, балаға қолдау көрсетудің бірыңғай стратегиясын қалыптастырды. Практикалық формат кәсіби білімді талқылап қана қоймай, оны педагогтің білім беру тәжірибесінде қолдана алатын нақты әрекеттерге айналдыруға мүмкіндік берді.

Іс-шара аясында университет ғалымдары Досым Ерболатұлының жетекшілігімен коммерцияландыру жобасы аясында әзірлеген ДЦП-сы бар балаларға арналған техникалық оңалту құралдарының көрмесі де ұйымдастырылды. Ұсынылған әзірлемелер ғылыми шешімдерді, заманауи технологияларды және балалар мен мамандардың практикалық қажеттіліктерін ұштастырудың мүмкіндіктерін көрсетті.

Сараптамалық кейс-сессия ашық кәсіби пікір алмасу мен тәжірибе бөлісу алаңына айналды. Кездесу ДЦП-сы бар балаға тиімді көмек көрсету тек бір маманның көзқарасы аясында мүмкін еместігін тағы бір мәрте көрсетті. Дәрігер, педагог, арнайы педагог, логопед, психолог, емдік дене шынықтыру маманы және басқа да мамандар бір жағдайдың әртүрлі қырын көреді. Алайда олардың барлығының ортақ мақсаты – баланы қолдау үшін күш-жігерді біріктіру.

Бір бала – түрлі кәсіби көзқарас – қолдаудың бірыңғай стратегиясы.

Сәрсен Аманжолов атындағы Шығыс Қазақстан университеті инклюзивті білім беруді, пәнаралық өзара іс-қимылды және ерекше білім беру қажеттіліктері бар балалар үшін қолжетімді білім беру ортасын қалыптастыруға, олардың мүмкіндіктерін кеңейтуге бағытталған практикалық бастамаларды қолдайды.

Университет кәсіби пікір алмасуға, тәжірибе бөлісуге және білім беруді барынша қолжетімді, қолайлы әрі әр баланың мүмкіндігіне бағытталған етуге мүмкіндік беретін шешімдерді іздеуге арналған алаң қалыптастыруды жалғастыруда.