AMANZHOLOV UNIVERSITY-ДЕ ЭКОЛОГИЯ ЖӘНЕ ГЕОГРАФИЯ БАҒЫТЫНДАҒЫ БІЛІМ БЕРУ БАҒДАРЛАМАЛАРЫН ЖАҢАРТУ МӘСЕЛЕЛЕРІ ТАЛҚЫЛАНДЫ

Сәрсен Аманжолов атындағы Шығыс Қазақстан университетінің Экология және география кафедрасында 2026–2027 оқу жылына арналған білім беру бағдарламаларын оқу-әдістемелік қамтамасыз етуді жетілдіруге бағытталған ғылыми-әдістемелік семинар өтті.

Семинарға кафедраның профессор-оқытушылар құрамы мен білім беру бағдарламаларының менеджерлері қатысты. Кездесу барысында оқу-әдістемелік материалдарды өзектендіру, білім беру үдерісінің сапасын арттыру, материалдық-техникалық базаны дамыту және мамандар даярлауда заманауи тәсілдерді енгізу мәселелері қарастырылды.

Кафедраның әдістемелік жұмысына жауапты сениор-лектор Серік Бакин шолу баяндамасын жасап, жаңа оқу жылына арналған оқу-әдістемелік қамтамасыз етудің дайындық деңгейіне баға берді. Сондай-ақ алдағы жұмыстың негізгі міндеттері мен басым бағыттарын айқындады.

Баяндамада оқу пәндерінің силлабустарын өзектендіру, оқу-әдістемелік кешендерді жетілдіру, пәндер мазмұнын жоғары және жоғары оқу орнынан кейінгі білім берудің заманауи талаптарына сәйкестендіру, сондай-ақ инновациялық білім беру технологияларын қолдану аясын кеңейту мәселелеріне ерекше назар аударылды.

Талқылаудың маңызды бағыттарының бірі кафедраның материалдық-техникалық базасын дамыту болды. Қатысушылар мамандандырылған оқу кабинеттері мен зертханаларды жаңғырту, оларды заманауи жабдықтармен, көрнекі материалдармен, цифрлық ресурстармен және бағдарламалық құралдармен қамтамасыз ету перспективаларын қарастырды.

Сонымен қатар білім беру үдерісінің ғылыми құрамдасын күшейту мәселесі көтерілді. Атап айтқанда, оқытушылардың ғылыми зерттеу нәтижелерін оқу пәндерінің мазмұнына енгізу, білім алушылардың зерттеушілік құзыреттерін қалыптастыру, тәжірибеге бағытталған тапсырмаларды, жағдаяттық кейстер мен жобалық оқыту әдістерін кеңінен қолданудың маңыздылығы атап өтілді. Оқу, ғылыми және практикалық қызметтің өзара сабақтастығын нығайту қажеттігіне де басымдық берілді.

Семинар аясында кафедраның жекелеген даярлау бағыттарына арналған баяндамалар да ұсынылды. Қауымдастырылған профессор Гүлфат Калелова «Тіршілік қауіпсіздігі және қоршаған ортаны қорғау» бағыты бойынша бакалавриат пен магистратураның білім беру бағдарламаларын оқу-әдістемелік қамтамасыз етудің жай-күйіне талдау жасады. Баяндамада пәндер мазмұнын жаңарту, білім алушылардың практикалық даярлығын жетілдіру, кәсіби құзыреттерін дамыту және білім беру бағдарламаларын саланың өзекті талаптарына сәйкестендіру мәселелері қамтылды.

Сениор-лектор Әсел Кайсарова болашақ география мұғалімдерін даярлауға бағытталған «География IP» білім беру бағдарламасын әдістемелік сүйемелдеудің ерекшеліктерін таныстырды. Баяндамашы педагогикалық пәндердің мазмұнын жетілдіру, заманауи білім беру технологияларын қолдану, болашақ педагогтердің цифрлық сауаттылығын дамыту және оқытудың практикалық бағытын күшейту мәселелеріне тоқталды.