«ТАЗА ҚАЗАҚСТАН»: ТАЗАЛЫҚ ӨЗІМІЗДЕН БАСТАЛАДЫ

«Таза Қазақстан» республикалық экологиялық акциясы аясында Сәрсен Аманжолов атындағы Шығыс Қазақстан университетінің «Экология» білім беру бағдарламасының орыс тілінде білім алатын 1-курс студенттері № 4 оқу ғимаратының аумағын тазарту және абаттандыру бойынша сенбілікке белсенді қатысты.

Іс-шараның негізгі мақсаты – студенттердің экологиялық мәдениетін қалыптастыру, қоршаған ортаға ұқыпты қарауға тәрбиелеу, экологиялық жауапкершілікті арттыру және жастарды табиғатты қорғауға бағытталған практикалық жұмыстарға тарту.

Сенбілік кезінде бірінші курс студенттері оқу ғимаратына іргелес аумақты тазалап, түскен жапырақтар мен тұрмыстық қалдықтарды жинады. Сонымен қатар көгалдандырылған аумақтар мен жаяу жүргіншілер жолдарын ретке келтірді.

Бұл шараның болашақ экологтар үшін маңызы ерекше. Өйткені студенттер қоршаған ортаны қорғау, экологиялық сананы қалыптастыру және тұрақты даму қағидаттарына адалдығын іс жүзінде көрсетті.

«Таза Қазақстан» акциясына қатысу – университет аумағының тазалығы мен көркеюіне үлес қосумен қатар, болашақ мамандардың кәсіби көзқарасын қалыптастыруға бағытталған маңызды қадам.

Осындай бастамалар студенттердің командалық рухын нығайтып, еңбекқорлығын, азаматтық белсенділігін және қоршаған ортаның жай-күйіне әр адамның жауапты екенін түсінуіне ықпал етеді.

Студенттер табиғатқа қамқорлық қарапайым, бірақ маңызды істерден – білім алатын, еңбек ететін және өмір сүретін ортамызды таза ұстаудан басталатынын өз үлгілерімен көрсетті.

Таза университет – таза қала – таза Қазақстан!