ИНТЕРАКТИВТІ МАРАФОН: ЗАМАНАУИ ДӘРІСКЕ ЖАҢА КӨЗҚАРАСТАР

«Үздік тәжірибелерді тарату: дәріс өткізудің белсенді әдістері» атты әдістемелік семинар аясында оқытушылар заманауи білім беру технологиялары мен оқу үдерісін ұйымдастырудың практикалық құралдарын меңгеруді жалғастырды. Бұл жолы цифрлық шешімдерге, жобалық технологияларға және дәрісті мазмұнды әрі серпінді етіп, студенттердің белсенді қатысуына мүмкіндік беретін әдістерге ерекше назар аударылды.

Педагогикалық білім беру және менеджмент кафедрасының аға оқытушылары Н.К. Ақитпаева, Ф.С. Кенжебекова және А.В. Косынцева аудиторияны тәжірибе алмасу мен кәсіби ізденіс алаңына айналдырды. Қатысушылар жаңа тәсілдермен танысып қана қоймай, оларды бірден тәжірибеде қолданып, өздерінің педагогикалық қызметінде пайдалану мүмкіндіктерін бағалады.

Семинарда интерактивті платформалар, жедел кері байланыс құралдары және студенттердің назарын сақтап, сабаққа белсенді қатысуына ықпал ететін геймификация элементтері таныстырылды. Командалық жұмыс, миға шабуыл және кейс әдісі форматтарына да ерекше қызығушылық танытылды. Бұл тәсілдер аудиторияны талқылауға және бірлесіп шешім іздеуге тиімді тартуға мүмкіндік береді.

Практикалық бөлімде интерактивті дәрістің құрылымын жобалауға басымдық берілді. Оқытушылар дәрістің мазмұнын көрнекі материалдармен, сұрақтармен, талқылаумен және кері байланыспен үйлестіруге мүмкіндік беретін құралдармен жұмыс істеді.

Жұмыс ашық микрофон форматындағы пікір алмасумен қорытындыланды. Оқытушылар ұсынылған құралдарды түрлі пәндердің ерекшеліктеріне бейімдеу мүмкіндіктерін талқылап, өз тәжірибелерімен бөлісті. Сонымен қатар жаңа форматтарды енгізу кезінде туындауы мүмкін мәселелерді спикерлермен бірге қарастырды.

Өткізілген семинар заманауи дәрістің дәстүрлі монолог аясынан біртіндеп шығып келе жатқанын көрсетті. Бүгінде дәріс – кәсіби пікір алмасу, бірлескен ізденіс және белсенді өзара әрекеттесу алаңы. Мұнда студент тек тыңдаушы емес, білім беру үдерісінің тікелей қатысушысына айналады. Осындай тәсілдер білім алушылардың белсенділігін арттырып, университеттегі заманауи білім беру ортасын дамытуға мүмкіндік береді.